Fjalë që fillojnë me...
Fjalë me të njëjtat parashtesa ose tema fjalëformuese.
Mëso si ta përdorësh
<<< Kthehu te kërkimi kryesor në fjalor
ZBËRTHÍM,~I m. sh. ~E, ~ET 1. Veprimi kur zbërthej diçka; ndarja e diçkaje në pjesë përbërëse; shkulja e diçkaje që është mbërthyer në diçka tjetër; kund. mbërthim. Zbërthimi i vozës (i armës). Zbërthim i plotë. Zbërthimi i dërrasave (i arkave) me sqepar. - Mos bëni gabime gjatë zbërthimit!
2. Nxjerrja a heqja e diçkaje nga vendi ku është futur, është mbërthyer a është kapur; shkopsitje. Zbërthimi i këmishës (i jakës, i xhaketës). Zbërthimi i rripit. Zbërthimi i orës.
3. spec. Shpërbërje. Zbërthim i mëtejshëm. Zbërthimi i lëndëve kimike. Zbërthimi i molekulës në pjesët përbërëse. Reaksion zbërthimi (kim.). Zbërthim radioaktiv (kim.). Zbërthimi i dritës në ngjyra të ndryshme duke përdorur prizmin (fiz.).
4. Shqyrtim i një vepre, i një ideje, i një koncepti a i një diçkaje tjetër, duke e vështruar nga të gjitha anët për ta bërë sa më të qartë e të kuptueshme; shpjegim i hollësishëm, shkoqitje, shtjellim. Zbërthim logjik. Zbërthimi i monografisë. Zbërthimi i programit (i projektit). Zbërthim i tekstit. Zbërthimi në faktorë (mat.). I bëri një zbërthim të mirë. Zbërthim i domethënies (i kuptimit). Zbërthimi i botës së brendshme të personazheve (let.). Zbërthimi i shprehjeve algjebrike. Zbërthime të një niveli shkencor. Zbërthimi i projektbuxhetit (fin.).
5. fig. Shtytje a ngucje për ta detyruar dikë të flasë çdo gjë që di për diçka a për dikë. Zbërthimi i dëshmitarit.
6. Heqje nga zgjedha e kafshëve të mbrehura, çmbrehje, zgjidhje.
✱Sin.: shkulje, shkopsitje, shpërthekim, zgafullim, hapje, shqyrtim, analizë, imtësim, përimtim, shtjellim, shkoqitje, shqepje, çmbrehje, zgjidhje, shpërbërje, tjetërsim.
ZGJÍDHJ/E,~A f. sh. ~E, ~ET 1. Veprimi kur zgjidh diçka; kund. lidhje. Zgjidhja e litarit. Zgjidhja e brezit. Zgjidhja e lidhëseve të këpucëve. Zgjidhja e duarve (e këmbëve etj.). Zgjidhja e qenit nga zinxhiri. Zgjidhja e foshnjës nga djepi. Zgjidhja e qeve (e kuajve). - Po ta ndiesh të vështirë zgjidhjen e retrave, priji dhe mos e zgjat.
2. mat. Përfundimi që del kur zgjidhet një problemë, një ushtrim etj.; përfundim. Zgjidhje e gabuar. Gjetja e zgjidhjes. Zgjidhja e ushtrimit (e problemit). Ekuacion me zgjidhje pozitive (negative, zero). Ekuacioni nuk ka zgjidhje (ka vetëm një zgjidhje). - Sa del zgjidhja? Zgjidhje me shkrim.
3. Rruga që duhet ndjekur për t'u zgjidhur një çështje, një problem etj.; përfundimi që i jepet një çështjeje etj.; rrugëzgjidhje, rrugëdalje. Zgjidhje e drejtë (e kënaqshme, e gabuar). Zgjidhje përfundimtare (e menjëhershme). Zgjidhje paqësore (politike). Zgjidhje shkencore (teorike, praktike, teknike). Zgjidhje ligjore (juridike). Zgjidhja e çështjes. I gjeti një zgjidhje. Gjen zgjidhje (diçka) zgjidhet. Kërkon (pret) zgjidhje. I jap zgjidhje (diçkaje) e zgjidh. E vetmja zgjidhje ishte marrja në dorë e qeverisjes së vendit nga shqiptarët. Po drejtuesit as që e kishin vrarë mendjen për të gjetur një zgjidhje për të qenë.
4. fig. Prishje, këputje, ndërprerje. Zgjidhja e kontratës. Këto nuk përbëjnë asnjë argument për të përligjur zgjidhjen e martesës.
5. Mënyra si vihet në jetë një projekt, një vepër skenike etj. Zgjidhja skenike (arkitektonike, urbanistike). Zgjidhje origjinale (krijuese, e goditur). Zgjidhja e regjisorit. Ka zgjidhje të ndryshme. Këto janë zgjidhje të njohura.
6. Fundi i diçkaje, që vjen si rrjedhim i një veprimi, përfundim. Kjo është një zgjidhje e denjë për historinë e lashtë e të re të kështjellës shqiptare.
7. let. Pjesa e fundit e një vepre letrare, që vjen pas pikës më të lartë të ngjarjeve e të veprimeve dhe që tregon se si zbërthehet e si përfundon konflikti, epilog. Zgjidhje realiste (e papritur). Pika e zgjidhjes. Mjetet artistike të zgjidhjes.
✱Sin.: çlidhje, lirim, çlirim, shkolitje, shkokëlim, çmbështjellje, çmbrehje, zbërthim, shkrehje, rregullim, ndreqje, prishje, këputje, ndërprerje, rrugëzgjidhje, rrugëdalje, gjetje, përfundim, përgjigje, epilog.
Fjalë me të njëjtat parashtesa ose tema fjalëformuese.
Fjalë që rimojnë ose mbarojnë me të njëjtat germa.
Kërko forma në përkufizime ose shembuj. _
© Akademia e Shkencave e Shqipërisë, 2026 —
Të gjitha të drejtat janë të rezervuara. Çdo riprodhim, i pjesshëm ose i plotë i veprës, qoftë në format elektronik e qoftë në letër, në kundërshtim me ligjin nr. 36/2016 (ndryshuar me ligjin nr. 37/2022, datë 14.4.2022): "Për të drejtat e autorit dhe të drejtat e tjera të lidhura me to", do të ndiqet ligjërisht.
www.akad.gov.al
Adresa: Sheshi "Fan Noli", Tiranë